|| ಖಾಲಿ ಒಲವು ||

ಒಲೈಸುವ ಪರಿ ಬದಲಾಗಿರಲು

ಒಲವಿನ ಮೂಟೆ ಖಾಲಿಯಾಗಲು   

ಸರಿ ಸಮಯ ಬಿಡುವಿಲ್ಲದಂತೆ

ಮರಿ ಮನಸು ಮುದುಡಿರುವಾಗ ||

ನಕ್ಷೆಯಲು ಉಳಿಸಿಲ್ಲ ನಿನ ಗುರುತು

ಮನಸಲ್ಲು ಉಳಿದಿಲ್ಲ ನನ ಮರೆತು

ಕೊನೆಯಿರದ ಕೋಶದಲು ಸಿಗದಂತೆ

ಆಡುಭಾಷೆಯ ಪದವಾಗಿ ಹೋದೆ ||

ನಿಘಂಟಿನಲಿ ನೀನಿರದಿರೆ ಇನ್ನೇನಿದೆ

ಖಾಲಿ ಕಾಗದದ ಪುಸ್ತಕ

ನನ್ನೆದೆಯ ಅರಮನೆಯು ಸೋರುತಿಹುದು

ನಿನ ಪ್ರೀತಿಯ ಹೊದಿಕೆಯಿಲ್ಲದೆ ||

ನಾ ಬಡವನಾದೆ ನಿನ ಒಲವಿಲ್ಲದೆ

ಬಲ್ಲಿದನಾಗುತಿರುವೆ ವಿಷಮದೆಡೆಗೆ

ನೀ ಒಲಿದು ಅಲೆದು ಹೋದೆ

ನನ ಅಲೆಮಾರಿ ಮಾಡಿ ಅಳೆದೆ ||

ಕುಳಿತಿರುವೆ ಚಹ ಕುಡಿಯಲು

ಗೂಡಂಗಡಿಯ ಎದುರಲಿ ತೋಚದೆ

ನೀ ಸ್ಥಳಾಂತರ ಮಾಡಿರಲು

ತಬ್ಬಿಬ್ಬಾಗಿಹೆನು ಕಲ್ಪಿಸಲು ಆಗದೆ ||