ಹೂವು ಬಾಡದಿರದು

ಮಳೆಯಲ್ಲಿ ನೆಂದರೂ ಬಿಸಿಲಲ್ಲಿ ಬೆಂದರೂ

ಹೂವೆಂದೂ ಬಾಡದೇ ಇರಲಾರದು

ಇವ ಮೇಲೇ ಎದ್ದರೂ ಅವ ಕೆಳಗೇ ಬಿದ್ದರೂ

ಸಾವನ್ನು ಗೆದ್ದು ಬರಲಾಗದು

ಶೃತಿಯರಿತು ಇಡಬೇಕು ಸರಿಯಾದ ಹೆಜ್ಜೆ

ಇದ್ದಲ್ಲೇ ಹೊರಬೇಕು ಅವ ಕೊಡುವ ವಜ್ಜೆ

ಅಂತ್ಯಾದಿ ನಡುವೆ ಹೋರಾಟದುಳುಮೆ

ಹೊಂದಾಣಿಕೆಯೊಂದೆ ಈ ಬಾಳ ಗರಿಮೆ

ಗಳಿಸಿರುವ ಹಣವನ್ನು ನೀ ಹಂಚಿ ಸಾಗು

ಜನರೊಡನೆ ಛಲಬಿಟ್ಟು ನೀ ಕೊಂಚ ಬಾಗು

ಕೈ ಚಾಚಿ ನೆರವಾಗು ಬೇಡಿರುವ ಜನಕೆ

ನೋವಲ್ಲಿ ಜೊತೆಯಾಗು ಅಳುತಿರುವ ಮನಕೆ

ಮುಗುಳಿನ ಗಂಧ

ಬಯಲು ವೇದಿಕೆ ಮೇಲೆ

ಬೆಳೆದು ನಿಂತಾ ಮುಗುಳೆ

ಹೇಳು ಭೀಗುವ ಮುನ್ನ

ಯಾವ ಪಯಣವು ಭಿನ್ನ

ಎಲ್ಲೂ ಬೇಡದ ಮುನಿಸು

ಎಲ್ಲಾ ಬಯಸುವ ಕನಸು

ಹೊಂದಿದ ಬಗೆಯನ್ನು ತಿಳಿಸು

ಆಗುವ ಕಲೆಯನ್ನು ಕಲಿಸು

ನರಳಿ ತೂರುತಲಿರಲು 

ಬದುಕ ಬಂಡಿಯ ಒಳಗೆ

ಮಿಂಚು ಹುಳುವಿನ ರೀತಿ

ಮಿನುಗಿದಾ ದೀಪ

ತತ್ವವನು ತೊರೆದಂತೆ 

ಸಾಗಿದೆಯಾ ಬಾಳಿನಲಿ

ಸತ್ವವನು ಎದುರಿಟ್ಟು

ತೋರುವುದೇ ಕ್ರಾಂತಿ

ಜನರೆಲ್ಲ ಬೇಡುತಿಹ

ಹಾರೋ ದುಂಬಿ ಹರಡುತಿಹ

ಜೇನಿನ ಸಿಹಿಯಲ್ಲೂ

ಮುಗುಳಿನ ಗಂಧ

ಪ್ರೀತಿ ಹರಿವ ಹೊತ್ತು

ಸ್ಪೂರ್ತಿಯಾಗಲು ಅಸ್ತು

ಇರುವ ತಡೆಯನು ತೊಡೆದು

ನುಡಿಯುವುದೇ ಶಾಂತಿ

ಮೌನದಲೆ ಹಂಗಿಸುವ

ಮಾತಿನಲೆ ತಿವಿಯುತಿಹ

ಹಂಗಿನರಮನೆಗಿಂತ 

ಇಂಗಡದ ಗುಡಿ ಲೇಸು

ಹೊತ್ತುಗೊತ್ತು ಇಲ್ಲದಲೆ

ಸುತ್ತ ಸುತ್ತಿ ಹುಡುಕುತಿಹ

ಭ್ರಷ್ಟ ಸಂಸಾರಿಗಳು

ಪರಿಸರದ ಕಾಂತಿ...

ಬಯಲಿನ ಗೋಪುರ

ನನ್ನೆದೆಯ ಬಯಲಿನ ಗೋಪುರ

ನಿನ್ನ ನೆನಪಿನ ಪ್ರೀತಿಯ ಸ್ಮಾರಕ

ಒಣ ಹುಲ್ಲಿನ ಹಾಸಿಗೆ ರೂಪಕ

ಭಿನ್ನ ಮನಸಿನ ಭಾವನೆ ಪೂರಕ

ಬಿಸಿಯುಸಿರಿದು ಸೋಕಲು ಮೆಲ್ಲಗೆ

ನನ್ನ ಹಂಬಲವಾಗಲು ಮೆಲ್ಲಗೆ

ನಿನ್ನೆದೆಯ ನೆನಪಿನ ದೀವಿಗೆ

ಬೆಳಗುವುದೇ ಒಲವಿನ ಪ್ರೀತಿಗೆ

ಅಳಿವಿರದ ದೀಪದ ಜೋಳಿಗೆ

ಹೊತ್ತುತರಲು ಕಣ್ಣಿನ ಕಾಡಿಗೆ

ತಿಳಿಸುವುದೇ ನೀತಿಯ ಬಾಳಿಗೆ

ಹಸಿರಾಗಲು ಶಾಶ್ವತ ಕೂಳಿಗೆ

ಜಾಣ್ಮೆಯ ಗಾಳ

ಮನಸಿನ ಇಳೆಯಲ್ಲಿ ಸ್ವಾಭಿಮಾನದ ಬಾಳು

ನನಸಿನ ಅಂಗಳದಿ ನೆಂಟರಿಷ್ಟರ ಗೋಳು

ಕಳೆವುದು ನೀತಿಯ ಆತ್ಮೀಯ ಬಂಧ

ಮುಗಿವುದು ನಮ್ಮಯ ಪ್ರೀತಿಯ ಸಂಬಂಧ

ಸೋಲು ಗೆಲುವಿನ ಮೂಲ

ಗೆಲುವು ಅಹಂಕಾರದ ಬಾಲ

ನಾನು ನನ್ನದೆಂಬ ಕಾಲ

ಆಗುವುದು ನಮ್ಮ ಬಾಳಿಗೆ ಶೂಲ

ಬದುಕುವ ಹೊತ್ತಲ್ಲಿ ವಿವೇಚನೆಯೇ ದಾಳ

ಮಾತು ಮಾರ್ಮಿಕ ಜಾಲ

ಸೂಕ್ಷ್ಮ ಅರಿವಿನ ಕೋಲ

ಮೂದಿಸುತ ಜರಿಯಲು ಕೀಳ

ಕೈಯಾಭರಣ ಕೋಳ

ಹೊಂದಾಣಿಕೆ ಮಾತು ಜಾಣ್ಮೆಯ ಗಾಳ

ಧೃತಿಯ ಕಿರಣ

ಮನದಾ ಮನೆಯಲ್ಲಿ ಧೃತಿಯ ಕಿರಣ

ಬದುಕಾ ಬಯಲಲ್ಲಿ ಪುಟಿದೆದ್ದಿದೆ ಚರಣ

ಏನೋ ಒಂದು ಎದುರಾಗಿದೆ

ಬೆಳಕಾ ಹನಿಸೋ ಬೆಳ್‌ ಮೂಡಿದಿದೆ

ಧೀ ಆರಿದ ಕಾರಣ ಶನಿಯಾಟದ ಹೂರಣ

ತಲೆಯೇರುತ ಕಿವಿಯಲಿ ಬೆರಳಿಡುವನು ಖುಷಿಯಲಿ

ಮಂಕಾದರೆ ಮುಗಿಯಿತು ಮೇಲೇರುವ ಸರಣಿ

ಬೆಳಕಾಗುವ ಭರವಸೆ ತಿರುಗುತಲಿ ಧರಣಿ

ಚಿವ್ ಚಿವ್ ಗುಬ್ಬಿ

ಚಿವ್ ಚಿವ್ ಗುಬ್ಬಿ ನೆನಪಾಗಿದೆ

ಯಾಕೋ ಏನೋ ಮರೆಯಾಗಿದೆ

ಬೆಳಿಗ್ಗೆ ಎದ್ದು ಹೂ ಕೊಯ್ಯುವಾಗ

ಹಳೆ ಅನ್ನ ಹೆಕ್ಕಿ ತಿನ್ನುತಲಿತ್ತು

ಆ ದಿನಗಳ ನೆನಪು ಮಾಸೋಗದೆ

ಹೊಸದಿನಗಳಿಗಾಗಿ ಮುಡಿಪಾಗಿದೆ

ಹುಲ್ಲು ನಾರು ಹೆಣೆದ ಗೂಡು

ಮಾಡ್ಗುಳಿಯಲ್ಲಿ ಬರಿದಾಗಿದೆ

ಮನೆಯೊಳಗೆ ಮಲಗಿರುವ ನಮಗೆ

ತಿಳಿಸುವವರು ಇಲ್ಲಾ ಬೆಳಗಾದ ಘಳಿಗೆ

ಬಾಲ್ಯದ ಸಂಗಾತಿ ಬಾಗಿಲೆದುರಿಗೆ ಬಂದು

ಸ್ವಾಗತಿಸುವ ರೀತಿಯೇ ಮನಮೋಹಕ

ಬಿಳಿಯ ಗುರಿತಿನ ಗಂಟಲಿನ ಬಾಗ

ಕುಣಿಕುಣಿದು ಸೇಳೆಯಲು ಕಣ್ನೋಟವೇ ಸಖ

ಮಡಿಲ ನೂಲಿನ ಕೌದಿ

ಮಡಿಲಿನ ನೂಲನ್ನು ನೇಯುವ ನೇಕಾರ

ಅನುಭವಿಸೋ ನೋವನ್ನು ಪೇಳದೆ ಝೇಂಕಾರ

ಮೂಡಿದ ಬೆಳಕಲ್ಲಿ ನೋವಾರುವುದೇ ನೀತಿ

ಕಮಲದ ಕಣ್ಣಿನಲಿ ಕಾಡಿಗೆಯ ಕರಿಗುರುತು

ಅರಿಯದ ಮನಸಲ್ಲಿ ಮುಸುಕಿನ ಗುದ್ದಾಟ

ಸೂಕ್ಷ್ಮತೆಯ ಆರೈಕೆ ಒಲವಾಗುವ ಮುನ್ನ

ವ್ಯಾಪಾರ ವಹಿವಾಟು ಅತಿಯಾಯಿತು ಭಿನ್ನ

ಸಂತೈಸುವ ಮನಸು ಜೊತೆಯಾಗಲು ತಣಿಸು

ದೀಪವಾರುವ ಹೊತ್ತು ಆಗದಿರಲಿ ಕುತ್ತು

ಸಖಿಯ ಭಾವ

ಬೃಮರ ರೂಪ ತಾಳಿರುವ

ಭ್ರಮೆಯು ಮನದಲಿ

ಮಿಂಚ ವೇಗ ಮೀರಿಹುದು

ಗುಡುಗಿ ಅಡಗಿ ಹೋಗಿಹುದು

ಧೃತಿಯ ಹುರುಪು ಇಲ್ಲದೆ

ಕೃತಿಯು ಜನ್ಮ ತಾಳದು

ಮಿತಿಯು ಮೀರಿ ಹೋಗದಿರೆ

ಭ್ರಾಂತಿ ಕುಡಿಯು ಚಂದವು

ಶಾಂತಿ ಮಂತ್ರ ಜಪಿಸಲು

ಕ್ರಾಂತಿ ತಂತ್ರ ಶಪಿಸಲು

ಸಖಿಯ ಭಾವ ಹೊಂದಲು

ಸತಿಯ ನೋವ ಹರಣವು

ಮನದ ಮದ

ಮನದ ಮದವೆ ಸೇರು ಸಾವಿನೂರ 

ಭಾವ ಬಂಧವ ಕಡಿದು ಸಾಗು ದೂರ

ಮನದ ಮನೆಯಲಿ ಜನಿಸು ಸ್ನೇಹಿ ಕುವರ

ಹಂಚಿ ಹನಿಸುತಲಿರು ನುಡಿದು ಪ್ರೀತಿ ಪ್ರವರ

ಜಗದಿ ಜನಿತ ಜೀವಕುಂಟು ಕರ್ಮ ದಾರ

ಹಿಡಿದು ಕುಣಿಸುನು ಮೇಲಿನ ಸೂತ್ರದಾರ

ನೀತಿ ನಾಯಕನಿವನು ತಿಳಿಸಿ ನೇರ

ಎಡವಿದರೆ ಜಡಿಯುವನು ಮೌನಿ ಧೀರ

ನಾನು ನನ್ನದು ಎಂಬ ಅಹಂಕಾರ

ಬಲಿತರದು ಒಡೆಯುವುದು ಪ್ರೀತಿ ಸಂಸಾರ

ನಾವು ನಮ್ಮವರೆಂಬ ಭಾವ ಸಾರ

ಅದನರಿತು ಸಾಗುವುದೇ ಜಾಣ್ಮೆ ವೀರ

ಹೆದರದಿರು ಫಲಗಳಿಗೆ

ಉಸಿರಿನಲೆ ಹಸಿರೊಡೆವ ಭಾವ ತೀರ

ಈಜುತಲಿ ದಡಸೇರು ಹೇಳಿ ಪ್ರವರ

ಊರಾಚೆ ಅಡಗಿರುವ ವಿಷಯ ಘೋರ

ಬಿಡಿಸುತಲಿ ಮಾತಾಡು ಪ್ರೀತಿ ಕುವರ

ಜೀವನದ ಯೋಚನೆಯ ಹೊರಲು ಭಾರ

ಅನುಭವದಿ ಬಿಡಿಸು ನೀ ಅರಿತು ಸಾರ

ಕೊಸರಾಡು ಬಾಳಿನ ತಿರುವು ಧೀರ

ಹೆದರದಿರು ಫಲಗಳಿಗೆ ಸಹಜ ವೀರ

ಪ್ರತಿಗೀತಿ ಇತ್ಯಾದಿ

 ನೀನು ನಾನಲ್ಲ ನೀನೆ ನಾನಲ್ಲ

ನೀನೆ ನಾನೆಂಬ ನನ್ನ ನಿನ್ನ ಬಿಂಬ 

ತೋರುವುದು ಜಗಕೆಲ್ಲ ಒಣ ಜಂಭ

ಭಾನು ಅಳಿದಾ ಮೇಲೆ ಬೆಳಕು ಕಳೆದಾ ಮೇಲೆ 

ತೋರುವುದು ಇನ್ನೆಲ್ಲಿ ಪ್ರತಿಬಿಂಬ

ಮಾತು ಕೊಟ್ಟ ಮೇಲೆ ಮೌನ ಬಿಟ್ಟ ಮೇಲೆ

ಮಾತು ಮಾತಾಗೇ ಉಳಿಯಲ್ಲ ಒಂದು ಮಾತಾಗೇ ಉಳಿಯಲ್ಲ

ಕೊಟ್ಟಾ ಮಾತಾ ನೀನು ಮುರಿದು ಬಿಟ್ಟ ಮೇಲೆ ಅಪರಾಧಿಯಾಗುವೆಯೋ ಜಗಮಲ್ಲ

ಕುಟುಕು ಮಾತಿನ ಮಾಲೆ ಕಪಟಿ ಮೋಸದ ಜಲ್ಲೆ

ಜೋಡಿಸದು ಎರಡಂಕಿಯ ಜನರನ್ನ

ಕಡಿಯುವುದು ಸೂರಾದ ಮಡಿಲನ್ನ

ನೀತಿ ತೊರೆದಾ ಮೇಲೆ ಮೌನ ಮುಡಿದಾ ಹಾಗೆ

ಎಲ್ಲಂತ ಸಿಗುವುದು ಪ್ರತಿಗೀತಿ ಇತ್ಯಾದಿ

ಪುಟವನು ಸೇರು

ನೀನೊಬ್ಬ ಅನುಭವಿ ಬಾಳಿನಲಿ ಸೋತಾಗ

ಕಲಿಕೆಯ ಪರಿವಿಡಿ ಛಲದಲಿ ಪುಟಿದಾಗ

ದುಡಿಮೆಯ ಹಠಬೇಕು ವಿಜಯವ ಧರಿಸಲು

ಒಲುಮೆಯ ಹಿತಸಾಕು ಅರಿಯನು ಮಣಿಸಲು

ಚಟವನು ತಡೆದು ಏಣಿಯ ಏರು

ಕೆಡುಕಲಿ ನಿಂತಾಗ ಸೂತಕ ಮನದಲಿ

ಕಸಿವಿಸಿಯಾದಾಗ ಜಾತಕ ಕೈಯಲಿ

ಒಳಿತನು ಬಯಸಲು‌ ಒಸಗೆಯು ಬೇಡ

ಉಸಿರನು ಕಾಯಲು ಬೆಸುಗೆಯು ಬೇಡ

ಪ್ರೀತಿಯ ಹಂಚುತ ಪುಟವನು ಸೇರು

ನವಿಲಿನ ಕುಣಿತ ಕೋಗಿಲೆ ಹಾಡು

ನೋವಿನ ಸಾವಿನಲಿ ನಲಿವಿನ ಯುಗವುಂಟು

ನವಿಲಿನ ಕುಣಿತಕ್ಕೆ ಕೋಗಿಲೆ ಹಾಡುಂಟು

ಎನ್ನುತ ಬದುಕುವುದೇ ಭರವಸೆ ಜೀವನ

ಸೋಲು (ಸೋಲೆ) ಗೆಲುವಿನ ಮೂಲ ಸ್ವಾರ್ಥ ಬದುಕಿಗೆ ಶೂಲ

ಮರೆತವ ನೀನಾಗು ತೊರೆದು ಅಹಮ್ಮಿನ ಮೇಳ

ಸ್ಪೂರ್ತಿಗೆ ಪದವುಂಟು ಸ್ನೇಹಕೆ ತಪವುಂಟು

ಪ್ರೀತಿ ಪ್ರೇಮದಗಳಿಕೆ ಹೊತ್ತಿನ ಬಳುವಳಿಯು

ಕಲಿಯುವ ಹಪಹಪಿಗೆ ಮನದಲಿ ಛಲವುಂಟು

ಹಾರುವ ಕಪಿಗಳಿಗೆ ಉಣ್ಣುವ ಗುರಿಯುಂಟು

ಜನಿಸಿದ ಮಗುವೆಂದೂ ಹುಲ್ಲುಣ್ಣಲಾರದು

ಎಂಬೆಲ್ಲ ಮಾತಲ್ಲಿ ಬಾಳಿನ ಗುಟ್ಟುಂಟು

ಗುಟ್ಟರಿಯದ ಬದುಕು ವ್ಯರ್ಥಕೆ ಸಮವುಂಟು

ತಳಿದವನ ಬಾಳಲ್ಲಿ ನಿಲುಗಡೆ ಖಚಿತವು