ಮತ್ತೆ ಬೆರೆಯಲಿ

ನೂಲ ನೇಯುತ
ಏಣಿ ಮಾಡುತ
ಗಗನ ಹತ್ತಲು ಸಾಧ್ಯವೇ?
ಹೇಗೆ ನಂಬಲಿ
ಅದರ ದೃಢತೆಯ
ಮೆಲ್ನೋಟಕೂ ಕಾಣುವುದು
ಹುಸಿಯುವ ಅಸ್ಥಿರತೆಯು

ರೆಪ್ಪೆ ಮುಚ್ಚಲು ಶಬ್ದಬಾರದು
ಕಣ್ಣಂಚಿನ ಬೆಳಕು ಮಿಂಚಾಗದು
ಕನಸಿನ ಕಲ್ಪನೆಯ ಆಗಸಕೆ
ಜೋತು ಬೀಳಲಿ ಘಂಟೆಯು
ಎದೆಯ ದುಗುಡದ ಬಡಿತ
ಕೇಳಲಿ ಕೆಪ್ಪಾದ ಜಗಕೆ
ಹೆಪ್ಪುಗಟ್ಟಿದ ನೋವ ಹಾಲನು
ಚೆಲ್ಲು ಹೊಡೆಯಲು ಘಂಟೆನಾದವು

ಚಪ್ಪಾಳೆಯಾಗದು ಒಂದೇ ಕೈಯಲಿ
ಜ್ಞಾತೃ ಸಲ್ಲದು ಬೆರೆವ ಮನಸಲಿ
ಚಿಪ್ಪು ಒಡೆದಾಗ ಮುತ್ತು ಸಿಕ್ಕಂತೆ
ಬೇರಾದ ಬದುಕು ಬೆರೆಯುತ
ಅಹಂಕಾರ ತೊರೆದು ಚೊಕ್ಕಾಗಲು
ಚಾಣದ ಪೆಟ್ಟು ತಿಂದ ಕಲ್ಲಿನಂತೆ
ಮೂರ್ತಿಯಾಗಿ ಪೂಜೆ ಪಡೆದಂತೆ
ವಿರಸದ ಪ್ರೇಮಿಗಳು ಸರಸಿಗಳಾಗಲಿ