|| ಕಾಲ ಚಕ್ರ ||

ತಿರುಗುತಲೆ ತಿರುಗುತಲೆ

ಮತ್ತೆ ಬರುವುದು ಅಲ್ಲಿಗೆ

ಆಳಾಗಿ ದುಡಿದು ಅರಸನಂತೆ ಉಣ್ಣುವರು

ಅರಸನಂತೆ ಮೆರೆದು ಆಳಾಗಿ ಗೇಯುವರು

ಆಳಾದರೇನು, ಅರಸನಾದರೇನು

ಮಾನವನಾಗಿ ಹುಟ್ಟಿದ್ದು ಆ ದೇವನ ವರವು ||

ಜನಿಸಿದ ಜೀವವು ಬದುಕುವ ಕಾಲದಲಿ

ಏರಿಳಿತ ಕಾಣುವುದು ನಡೆಸುವ ಸಂಸಾರದಲಿ

ಹುಟ್ಟುಸಾವು ಬದುಕಿನ ಆದಿ ಅಂತ್ಯವು

ಸತ್ತ ಮೇಲೆ ಬೆಳೆವರು ಬ್ರೂಣವಾಗಿಯೆ

ಪುನಃ ತಾಯಿಗರ್ಭದಲ್ಲಿ ಮಾಂಸ ಮುದ್ದೆಯಂತೆಯೆ

ತಿರುಗಿ ತಿರುಗಿ ಅಭಿನಯಿಸ ಬೇಕು ಜೀವನ ನಾಟಕದಲಿ ||

ಮಳೆಹನಿಗಳೆಲ್ಲ ಹರಿದು... ಹಳ್ಳವೊಂದರಲಿ ಬೆರೆತು

ಹೊಳೆಯ ಒಡಲನು ಸೇರುವ ಮಾತಿಲ್ಲಿ

ಹೊಳೆಗಳೆಲ್ಲವು ಓಡುತ... ತುಂಬಿದ ನದಿಯನು ಸೇರುತ

ಕಡಲ ಗರ್ಭದಲಿ ಮುಳುಗುವ ಹಾಡಿಲ್ಲಿ

ಕರಿಯ ಮುಗಿಲಾಗಿ ಹಾರುತ ತಿರುಗಿ ಭುವಿಯ ಬಾಯರಿಕೆ ನೀಗುತ

ಆ ಕಾಲದ ತಾಳಕೆ ತಿರುಗುವ ಚಕ್ರವು ಕುಣಿಸುವ ನಾಟ್ಯವು ಹೀಗಿಲ್ಲಿ ||