ಬಾವ ಬೆರೆಸಬಹುದೇ?

ಬಣ್ಣವಿರದ ನೀರಿನಲಿ
ಭಾವನೆಯನು ಬೆರೆಸಲಾಗುವುದೇ?
ಮರೆಮಾಚಲು ಮನದ ಇಂಗಿತವನು
ಕಣ್ಣೀರು ಕಾಣದಿರಲು ಮಳೆಯಲ್ಲಿ ನೆನೆದಂತೆ

ಹುಣ್ಣಿಮೆಯ ಬೆಳದಿಂಗಳಿನಲಿ
ರವಿಯು ರಮಿಸಲಾಗುವುದೇ?
ತಣಿಸಲು ಉರಿಯ ತಾಪವನು
ದೇಹದ ಸುಸ್ತು ನೆರಳಲ್ಲಿ ನವಿರಾದಂತೆ

ಬೆವರ ಹನಿಯಲಿ
ಕಂಬನಿಯ ಅಡಗಿಸಬಹುದೇ?
ತೋರಿಸಲು ದೇಹದ ದಣಿವನು
ಮನದ ನೋವಿಗೆ ಮುಖವಾಡ ಹಾಕಿದಂತೆ

ಕಣ್ಣ ಸನ್ನೆಯಲಿ
ಮನದ ಮಾತನಾಡಬಹುದೇ?
ಅರುಹಲು ಶಬ್ಧ ಸಂವೇದನೆಯನು
ಬಾಯಿ ಮಾತಿಗೆ ನಿವೃತ್ತಿ ನೀಡುವಂತೆ