ನಂಬಿಕೆಗೊಂದು ಕಲ್ಪನೆ

ಮಾತಿನಲಿ ಹೇಳಲಾಗದ ನಂಬಿಕೆ
ತನ್ನದೇ ಉಳಿವುಂಟು ಗತಕೆ
ಸೌಮ್ಯ ಸಮ್ಮತಿಯಿಹುದು ಬಲಕೆ
ಸ್ಪೂರ್ತಿ ನೀಡುತಿಹುದು ಜಗಕೆ

ಲಿಖಿತ ಲೇಖನ ಹಣೆ ಬರಹ
ಕಾಣದು ಗೀಚಿದ ಪದಗಳು
ಸಿಗವುದೆಂದೊ ಆ ಲೇಖನಿ
ಬೊಮ್ಮ ವಿಶ್ರಮಿಸಲೆಂದು ಕ್ಷಣಕೆ

ಸತತ ಸೃಷ್ಠಿಯ ಕರ್ಮಕೆ
ಗುಡಿಯಿರದು ಹುಟ್ಟಿಸಿದ ಫಲಕೆ
ಗೆಲುವಿಗುಂಟು ಸ್ವಾಮ್ಯದ ಜಂಭ
ಬವಣೆಗೆ ನೆಪ ಬ್ರಹ್ಮ ಬರಹ

ಯಕ್ಕಡದಲಿ ತುಳಿದರೂ ಬುಡದಲಿ
ಉಳಿ ಪೆಟ್ಟಿನ ಹೊಡೆತ ಅರಳಲು
ಅನಾವರಣ ಕಲ್ಪಿತ ಮೂರ್ತಿಗೆ
ಪೂಜೆ ನೈವೇದ್ಯ ತುಚ್ಛ ಶಿಲೆಗೆ

ಗರ್ಭ ಗುಡಿಯಲಿ ಕಾಣುವುದು
ನಂಬಿಕೆಗೊಂದು ಕಲ್ಪಿತ ರೂಪ
ಮಂದ ಬೆಳಕಿನಲಿ ಪ್ರಜ್ವಲಿಸುವುದು
ಬಾಳ ಬೆಳಗಿಸುವ ಆಧಾರ ದೀಪ