|| ನನದೇನಿದೆ? ||

ದಿಕ್ಕು ಅರಿಯದ ಜಾಗದಲಿ

ಪಯಣಕ್ಕೊಂದು ಹೆಸರು ಜೀವನ

ತಂದಿರುವುದಾದರು ಏನು?

ಒಯ್ಯುವುದಾದರು ಏನು?

ಅರಿಷಡ್ವರ್ಗಗಳ ಅಟ್ಟಹಾಸದಲಿ

ಕುಣಿಯುವ ಕರ್ಮಿ ಈ ದೇಹ ||

ಗಳಿಕೆಯನು ಕೂಡಿ ಮೆರೆವೆ

ನಗ ನಾಣ್ಯ ಗಳಿಸಿಕೊಳ್ಳುವೆ

ಆಡಂಬರಕೆ ಬಂಗಾರ ಘನತೆ

ಸತ್ತಾಗ ಬಟ್ಟೆಯು ಇರದು

ಏಕಾಂಗಿ ಶವದ ಜೊತೆ

ಚಿನ್ನವೆಲ್ಲಿಯ ಚೈತನ್ಯ ಬದುಕಲು? ||

ಕೆಳಗಿದ್ದಾಗ ಮೇಲತ್ತಿಸುವುದು ಏಣಿ

ಏರಿದಾಗ ಒದೆಸಿಕೊಳ್ಳುವುದು ಏಣಿ

ಬರೆದ ಬ್ರಹ್ಮನಿಗೆ ಹಣೆಬರಹ ತಿದ್ದಲಾಗದು

ಕಷ್ಟಕೆ ಕೈಮುಗಿದರೆ ದೇವನೇನು ಮಾಡುವನು?

ಸ್ವಯಂಚಾಲಿತವಲ್ಲ ಮಾನವ ಸೃಷ್ಠಿ ಇಂಧನವಿರದೆ

ಕೊನೆಯಾಗುವುದೊಂದೆ ವಿಧಿಯೆಂಬ ಕಾಲದ ನಿರ್ಣಯ ||

ಬರುವಾಗಲೂ ಹೋಗುವಾಗಲೂ ಬೆತ್ತಲೆ

ಪಯಣದಲಿ ಕಂಡಾಗ ಆರಿಸು ಕತ್ತಲೆ

ನನದೆಂದು ಹೇಳಿಕೊಳ್ಳುವ ಈ ದೇಹ

ನರಮಾಂಸರಕ್ತದಲಿ  ತುಂಬಿದ ಗಡಿಗೆ

ಪ್ರಾಣಹೋದಾಗ ಜೊತೆ ಬಾರದ ದೇಹವು

ಆತ್ಮ ಮಾತ್ರವೆ ನನದು ಶರೀರ ಪಂಚಭೂತದ್ದು ||

ಗುರುತಿನ ಮೈಕೂಡ ಸ್ವಂತವಲ್ಲ

ಗಳಿಸುವ ಬಿಡಿಕಾಸು ತನ್ನದಲ್ಲ

ಇತಿಹಾಸದಾಸ್ತಿ ಪಡೆಯುವ ಬಿರುದು

ಸ್ಮರಿಸುವ ಪರೋಪಕಾರ ಕಣ್ಣೀರಿನದು

ಹೋಗುವ ಪ್ರಾಣದ ಜೊತೆಬಾರದು ದೇಹ

ಯೋಚಿಸು ಜಗದಲಿ ನನದೇನಿದೆಯೆಂದು ||