|| ಮುಂಗಾರು ಮಳೆ ||

ನಡೆದಿದೆ ಅನ್ವೇಷಣೆಯ ಹೋರಾಟ
ಬದುಕಿನ ಬೆಳಕಿಗಾಗಿ ಹುಡುಕಾಟ
ಹೊನಲುಬೆಳಕಿನ ಕಾಂತಿಯಲು ಅರಸಿದೆ
ಮುಂಜಾವಿನ ತಿಳಿ ಬೆಳಕಿನಲು ಕಾಣದೆ ||

ವೃದ್ಧಿಸುತ್ತಿವೆ ಪ್ರತಿ ಕ್ಷಣದ ನಿರೀಕ್ಷೆಗಳು
ಬದುಕಲಿ ಬಯಕೆಯ ಭರವಸೆಗಳು
ಚಂಡಾಟದಂತೆ ತಪ್ಪದಿರಲೆಂಬ ತುಡಿತವು
ಆಸೆ ಕೈಗೂಡಲೆಂಬ ಮನಸಿನ ಮಿಡಿತವು ||

ನೀರಿರದ ಮರುಭೂಮಿಯಲಿ ಮಳೆಯಾದಂತೆ
ಬಯಲು ಭೂಮಿಯಲಿ ಕಾಮನಬಿಲ್ಲು ಮೂಡಿದಂತೆ
ಬರಡು ಭೂಮಿಯಲಿ ಹಸಿರು ಚಿಗುರೊಡೆದಂತೆ
ಕಲ್ಪಿಸಿದ ನೀ ಬರಲು ಮುಂಗಾರು ಮಳೆಯಾದಂತೆ ||