|| ಬಡತನದ ಬೆರಳು ||

ಬಡತನದ ಅರಮನೆಯ

ನಡುವಿನಲಿ ಕುಳಿತಿದೆ

ಅಕ್ಕಿಯನು ಆರಿಸುತಿರುವ

ಉಂಗುರವಿಲ್ಲದ ಬೆರಳು ||

ನುಚ್ಚಿನಲಿ ನುಸುಳುತ್ತ

ಕಲ್ಲನ್ನು ಅರಸುತ್ತ

ಗೆರಸಿಯಲಿ ಹುಡುಕುತಿದೆ

ಸಿಂಗಾರವಿಲ್ಲದ ಕೊರಳು ||

ಕಾರ್ಪಣ್ಯದಲಿ ಕಾಣದಿರಲಿ ಕಷ್ಟದ ಕನಸು

ಅಗದು ಮೆರೆಯುವ ಐಶ್ವರ್ಯದ ನನಸು

ಬಾಳಿನಲಿ ಬಾರದ ಭಾಗ್ಯವನು ಬಯಸುವುದು

ಇಚ್ಛಿಸಬಾರದು ಕೈಗೆಟುಕದ ಮಾಯಾಮೃಗಕೆ ||

ಮಂಕಾಗಿ ಮುಕ್ತವಾದ ಬದುಕಿನಲಿ

ಯಾರ್ಯಾರ ಪರಿಚಾರಣೆ ಮಾಡಲಿ

ಇನ್ನು ಅರಿವಿಗೆ ಬಾರದ ಗುಪ್ತಗಾಮಿನಿ

ಅಸುನೀಗಿ ಆಗಬಾರದೇ ಮುಕ್ತ ಮುಕ್ತ ||

ಅಕಿಂಚನತೆಯಲಿ ಏನನ್ನು ಯೋಚಿಸಲಿ

ಪಡೆಯಲಾಗದು ಬೇಕಾದ ರಿಕ್ತತೆಯನು

ಹಾರುವ ಮನಸನ್ನು ಮಲಗಿಸುತ

ಕಜ್ಜದಲಿ ಮಗ್ನವಾಯ್ತು ಬಡತನದ ಬೆರಳು ||