|| ಹೃದಯದ ಕಣ್ಣು ||

ನೀನೆಂದು ಪರಿತಪಿಸದಿರು ನನಗಾಗಿ

ನಾ ತೊರೆಯೆ ನಿನ್ನೆಂದು ಪರರಿಗಾಗಿ

ಅರಿಯುವೆ ನಿನ್ನ ದುಗುಡ ಮನಸಲಿ

ನಾನಿರುವೆ ಬಾಳಲ್ಲಿ ಸಮಾಜ ಮುಖಿಯಾಗಿ ||

ಯಾರೊಂದಿಗೆ ಮಾತನಾಡಿದರೂ

ನಿನಗೆಂದೆ ಮುಡಿಪಾಗಿರುವೆನು

ದಿಗಿಲಾಗದಿರಲಿ ಅಂತರಂಗದಲೆಂದು

ಕಳೆದುಕೊಳ್ಳದಿರುವೆ ನೀ ನನ್ನೆಂದು ||

ಹಲವಾರು ಜನರೊಂದಿಗೆ ಒಡನಾಟ

ಹತ್ತಾರು ವಿಷಯದಲಿ ಸೆಣೆಸಾಟ

ಯಾವ ಕ್ಷಣದಲಿ ಯಾರಾರಿಗಾಗುವರೊ

ಬೇಕಾಗುವರೆಂದು ಬೇರೆಯವರ ಬಿಡೆನು ||

ಅಂಜದಿರು ಅಳುಕದಿರು ಎಂದೆಂದು

ಒಂಟಿ ಮಾಡೆನು ಅಗಲಿ ನಿನ್ನೆಂದು

ಭಯಪಡದಿರು ಏಕಾಂಗಿಯಲ್ಲ ನೀನು

ಬೇರಾರ ಸೆಳೆತಕು ಸಿಗುವುದಿಲ್ಲ ನಾನು ||

ಏನಾಗಲಿ ಎಂಥಾಗಲಿ ಬದುಕಿನಲಿ

ಈ ಜೀವ ಮೀಸಲಾಗಿದೆ ನಿನಗಾಗಿ

ನೀನಾಗಿರುವೆ ಜಗ ನೋಡುವ ಕಣ್ಣುಗಳು

ನಾನಾಗಿರುವೆ ಅದ ರಕ್ಷಿಸುವ ರೆಪ್ಪೆಗಳು ||

ನೋವಿಗೆ ನೀರ ಸುರಿಸುವ ಕಣ್ಣಾದರೆ ನೀ

ಅದ ತಡೆದು ಮರೆಮಾಚುತ ರೆಪ್ಪೆಯಾಗುವೆ ನಾ

ಕುರುಡನಾಗುವೆ ಪ್ರೀತಿಯಲಿ ತೊರೆದರೆ ನಿನ್ನ

ಎಂದಿಗು ಕಳೆದುಕೊಳ್ಳೆನು ನನ್ನ ಹೃದಯದ ಕಣ್ಣ ||