|| ನನ ಬಾಳ ನಾವಿಕ ||

ಭಾವಗಳ ರಂಗೋಲಿಯನು
ಮನದಂಗಳದಿ ಬಿಡಿಸಿಹೆನು
ರಂಗಾದ ನಿನ ನೆನಪಿನ
ಬಣ್ಣಗಳ ತುಂಬಿಹೆನು
ಎದೆಯ ಜೋಪಡಿಯ ಮೇಲೆ
ಮಣೆಯನು ಹಾಕಿ ಕಾದಿಹೆನು
ಕಳಶಾಭಿಷೇಕ ಮಾಡಿಸಲು
ಸಾಲಾಗಿ ನಿಂತಿಹರು ಮುತ್ತೈದೆಯರು
ನವಬದುಕ ಬಯಸಿಹೆನು ನಿನ್ನಿಂದ
ನೀನೆಂದು ಬರುವೆಯೊ ನನ ವರಿಸಲು ||

ಉರಿಜ್ವಾಲೆಯಂತೆ ಸುಡುತಿದೆ
ವಿರಹದ ಬೇಗೆಗಳು
ನೀ ಬಂದು ಆರಿಸು ಈ ಜ್ವಾಲೆಯ
ಹನಿಗಳ ಸುರಿಸಿ ತಂಪಾಗಿಸೆಯ
ನಿನ ಬದುಕಿನ ಪಯಣಕೆ
ದೋಣಿಯಾಗುವೆ ನಾ ತೇಲಿಸಲು
ಹೃದಯದಿ ಹುದುಗಿರುವ ಭಾವಗಳ
ಹಾಡಾಗಿ ನಾ ಹೇಗೆ ಹೇಳಲಿ
ಬಳಿಬಂದು ಅರಿ ನೀ ಒಲವನು
ದೋಣಿಯೇರಿ ನೀನಾಗು ನನ ಬಾಳ ನಾವಿಕ ||