|| ನೆನಪಿನಂಗಳ ||

ಕಳೆದ ಆ ದಿನಗಳು ಬೇಕು

ಯಾಂತ್ರಿಕತೆಯ ಈ ಬದುಕಲಿ

ಎಲ್ಲರ ಮುದ್ಧಿನ ಮಗುವು

ಹಠವನು ಮಾಡಿದರು ಹರುಷವು

ಮರಳದು ಬೇಡಿ ತಪವನುಗೈದರು

ಹಿಂತಿರುಗೆವು ಹಿಂದಿನ ಬಾಲ್ಯಕೆ ||

ಅತ್ತರು ನಕ್ಕರು ತಿನಿಸುವರು

ಚಪ್ಪರಿಸುವ ಬಾಯಿಗೆ ಸಿಹಿಯನು

ಸರ್ವರು ತೋರುವರು ಕಾಳಜಿಯನು

ಬೀಳದಂತೆ ನೋಡುತ ಎಡವಿದರು

ಕಚಗುಳಿಯಿಡುತಲಿ ತುಂಟಾಟ ಮಾಡುತಲಿ

ಹುಚ್ಚುತನದಿ ಕಾಡಿದರು ಸಹಿಸುವರು ||

ಆನೆಯ ಮೇಲೆ ಅಂಬಾರಿ ಮಾಡುತ

ಉಪ್ಪಿನ ಮೂಟೆ ಬೇಕೆಂದು ಕೇಳುತ

ಕಂಬದಾಟದ ಜೊತೆ ಕಣ್ಣಮುಚ್ಚಾಲೆಯು

ಕವಡೆಯಾಟದಲಿ ಕಬಡ್ಡಿ ಜಗಳವು

ಸಾದುಗೋದುವಿನಾಟದ ಹರುಷವು

ಹಾಣೆಯಾಟದಲಿ ಹಂಡಿಯ ಸಹಿಸದ

ಮರಳದು ಜೋಕಾಲಿಯಾಡುವ ಸುಂದರ ದಿನಗಳು ||

ಗುಡ್ಡಗಾಡಿನಲಿ ಗರಗರ ತಿರುಗುತ

ನವಿಲುಗರಿಗಳ ಸಂಗ್ರಹ ಮಾಡುತ

ಜಂಬೆ ಮುಳ್ಳೆ ಹಣ್ಣಿಗೆ ಕಣ್ಣನು ಹಾಕುತ

ಬಿಂಬಲಕಾಯಿ ನೆಲ್ಲಿಕಾಯಿಯ ಕೀಳುತ

ಮಾವು ಹುಣಸೆಗೆ ಕಲ್ಲನು ಹೋಡೆಯುತ

ತೊದಲು ಮಾತಿನಲಿ ಬೈಗುಳ ಬಲುಚಂದ ||

ಚೆನ್ನೆಮನೆ ಆಡುತ ಚದುರಂಗ ಕಲಿಯಲು

ಪಗಡೆಯಾಟದಲಿ ಛಲಗಾರರಾಗಲು

ಮುಟ್ಟು ಆಟದಲಿ ಮುನ್ನುಗ್ಗುವ ವೀರರಾಗಲು

ಸಾಮಾಜಿಕ ಅರಿವಾಗುವುದು ಜನರಲಿ ಬೆರೆಯಲು

ಖುಷಿಯಲಿ ತೇಲುವ ತಲೆಬಿಸಿಯಿಲ್ಲದ ಸಮಯವು

ಬಯಸಿದರು ಬಾರದ ಬಾಲ್ಯದ ನೆನಪಿನಂಗಳ ||