|| ಸಂಬಂಧವೋ...ಅನುಬಂಧವೋ...?||

ಯಾವುದು ಸಂಬಂಧವು..?

ಯಾವುದೋ ಅನುಬಂಧವು..?

ಒಲವಿನ ತುಡಿತದ ಸಂಘಕೆ

ಮಿಡಿಯುವ ಬಾವನೆ ಬಂಧವೋ..?

ದೇಹದ ತುಂಬ ಬಹುಪಾಲು ನೀರು

ಹರಿವುದು ರಕ್ತವು ದೇಹದ ಗಾಯಕೆ

ಹೃದಯದ ತುಂಬ ತುಂಬಿದೆ ರಕ್ತವು

ಬರುವುದು ಕಣ್ಣೀರು ಹೃದಯದ ನೋವಿಗೆ

ಇದು ಯಾವ ರೀತಿಯ ಸಂಬಂಧ

ದೇಹ ಹೃದಯಗಳ ಅನುಬಂಧ...||

ವಸಂತ ಮಾಸದಿ ಮಾವು ಚಿಗುರಲು

ಕೋಗಿಲೆ ಗಾನವು ಬಲುಚೆಂದ

ಈ ನಿಸರ್ಗ ವಿಸ್ಮಯ ಕಂಡಿರಲು

ಅರಿವುದು ಬಾವನೆ ಬಂಧವು

ಇದು ಯಾವ ರೀತಿಯ ಸಂಬಂಧ

ಜೀವಿ ಪ್ರಕೃತಿಗಳ ಅನುಬಂಧ...||

ತಾವರೆ ಅರಳದು ಸೂರ್ಯನ ನೋಡದ ವಿನಃ

ನೈದಿಲೆ ನಲಿವುದು ಚಂದ್ರನು ಬಂದಾಗ ಪುನಃ

ಬೆಳಕು ಕತ್ತಲಲಿ ನಡೆವುದು ಹೂಗಳ ನರ್ತನ

ಪರಿಸರದ ತುಂಬೆಲ್ಲ ಪರಿಮಳ ಘಮ ಘಮ

ಇದು ಯಾವ ರೀತಿಯ ಸಂಬಂಧ

ಹೂವು ಹಗಲಿರುಳುಗಳ ಅನುಬಂಧ...||

|| ಇದೇನಾ ಪ್ರೀತಿ....? ||

 

ನನ್ನ ಮನದಲಿ ಮೂಡಿದ ಗೊಂದಲಕೆ

ನೀ ಉತ್ತರಿಸುವೆಯೇನು..?

ಒಂದು ಮೊಗವನು ನೋಡಿದ ತಕ್ಷಣಕೆ

ಪ್ರೀತಿ ಹುಟ್ಟುವುದು ಹೇಗೆ ನೀ ಹೇಳು...?

ಈ ಗೊಂದಲಕೆ ಉತ್ತರವೇ ಆ ಪ್ರೀತಿಯೇನು...?

ಮುದ್ದು ಮನಸು ಬಯಸಿರುವ

ಆ ಹೃದಯ ನೆನೆದಿರುವ

ಕಲ್ಪನೆಯ ರೂಪವನು ಎದುರಲಿ ಕಂಡಾಗ

ಹುಟ್ಟುವ ಒಲವೇ ಪ್ರೀತಿಯೇನು...?

ಎರಡು ಹೃದಯದ ಕಾಮನೆಯು

ಒಂದೇ ದಾರಿಯ ಹೊಂದಿರಲು

ಜೀವನ ಮೌಲ್ಯವ ಅರ್ಥೈಸುತ

ಪರಸ್ಪರ ಬೆಸೆಯುವ ಬೆಸುಗೆಯೇ ಪ್ರೀತಿಯೇನು...?

ಸುಂದರ ರೂಪವ ಕಂಡಾಗ

ಕಣ್ಣೋಟಕೆ ಕಣ್ಣೋಟ ಬೆರೆತಾಗ

ಸೇರುವವು ದೇಹಗಳು ಆಕರ್ಷಣೆಯಲಿ

ಆಗ ಸ್ಪರ್ಷಿಸುವ ಕಾಮವೇ ಪ್ರೀತಿಯೇನು...?

ಅರಿಯದೆ ಬದುಕುತ

ಎದೆಯೊಳಗಿನ ಸ್ವಾರ್ಥವ

ಈಡೇರಿಸಿಕೊಳ್ಳಲು ಹೊಂದಿರುವ ಮಾರ್ಗದ

ಸಂಕ್ಷಿಪ್ತ ರೂಪದ ಶಬ್ಧವೇ ಪ್ರೀತಿಯೇನು...?

|| ಸನಿಹಕೊಂದು ಗೆಳತಿ ಬೇಕು ||

ದಿನಕಳೆದ ಹಾಗೆಯೇ ವಯಸೀಗ ಜಾರಿದೆ
ಸನಿಹಕೊಂದು ಗೆಳತಿ ಬೇಕು
ಎಂದು ಮನವು ಹಾಡಿದೆ..
ಮನಬಿಚ್ಚಿ ಹೇಳುವ ದಿನದಿಛ್ಛೆಯಂತೆಯೆ
ಒಲವಿನಿಂದ ಇನಿಯ ಎಂದು
ಪ್ರೀತಿ ನೀಡಬೇಕಿದೆ...||

ಸೂರ್ಯಕಾಂತಿಯಂಥ ಮೊಗವ
ನೋಡುವಾಗ ಹೃದಯದಲಿ
ಗುಡುಗಿನಂತೆ ಮಿಡಿತಗಳಿಂದು
ಕೇಳಬೇಕು ನಿಂತಲೆ...||

ಸೂಜಿಮೊನೆಯ ಕಣ್ಣುಗಳಿಂದ
ನನ್ನ ನೀನು ಸೆಳೆಯುವಾಗ
ಖುದ್ದು ನಾನು ಹೇಳಬೇಕು
ನಿನ್ನೇ ಪ್ರೀತಿಸುವೆ ಎಂದು...||

ಹುಚ್ಚು ಬಗೆಯ ಮೆಚ್ಚೊ ಸಂದೇಶ
ಕದ್ದು ಕಳಿಸು ರಾತ್ರಿಲಿ
ನಿದ್ರೆಯಲ್ಲೂ ನೆನೆಯುವಂತೆ
ಮುದ್ದು ಮುದ್ದು ಕನಸಲಿ...||

|| ಸುಮ್ಮನೆ ಹೀಗೆ ಜೊತೆಯಲ್ಲಿ ||

ಬಾ ಗೆಳತಿ ವಿಹರಿಸುವ ಕೈಯಲ್ಲಿ ಕೈ ಹಿಡಿದು

ಸುಮ್ಮನೆ ಹೀಗೆ ಜೊತೆಯಲ್ಲಿ

ಮುಂಜಾನೆ ಮುಸ್ಸಂಜೆ ಮಳೆಯಲ್ಲಿ ನೆನೆಯೋಣ

ಸುಮ್ಮನೆ ಹಾಗೆ ಜೊತೆಯಲ್ಲಿ....||

ಚಳಿಬಿಟ್ಟು ಕುಣಿಯೋಣ ಖುಷಿಯಲ್ಲಿ ತೇಲೋಣ

ಹೆಜ್ಜೆಯನು ಹಾಕುತ್ತ ಡೊಳ್ಳಿನ ಕುಣಿತಕೆ

ಕಿವಿತುಂಬ ಕೇಳೋಣ ಗೀಗೀಯ ಪದವನ್ನ

ಕಣ್ತುಂಬ ನೋಡೋಣ ಯಕ್ಷಗಾನವನ್ನ

ಸುಮ್ಮನೆ ಹೀಗೆ ಜೊತೆಯಲ್ಲಿ....||

ಸುಗ್ಗೀಯ ಸೊಗಸಲ್ಲಿ ಕಾಮನ ಸುಡುವಾಗ

ಬಣ್ಣವನು ಎರೆಚೋಣ ಕೋಲಾಟ ಆಡುತ್ತ

ನವಿಲಗರಿ ಹೆಕ್ಕೋಣ ನೆಲ್ಲಿ ನೇರಳೆ ಸವಿಯುತ್ತ

ಕಡಲತೀರದಿ ಕೂರೋಣ ಭಾಸ್ಕರನ ಬೀಳ್ಗೊಡುತ

ಸುಮ್ಮನೆ ಹಾಗೆ ಜೊತೆಯಲ್ಲಿ....||

|| ಸಿಹಿ ನಗು ||

ಬೇಕೇ ಬೇಕು ಒಂದು ನಗುವು ನಿನ್ನ ಮೊಗದಲಿ
ಸಾಕು ಸಾಕು ಒಂದು ನಗುವು ವಿಶ್ವ ಗೆಲುವಲಿ
ನೋವನೆಲ್ಲ ಮರೆಸುವ, ನಲಿವನೊಂದೆ ಉಳಿಸುವ
ಜೇನಿನಂಥ ಸಿಹಿಯು ಉಂಟು ಮನತುಂಬೊ ನಗುವಲಿ ||

ನಗುತಲಿರಲು ನಮ್ಮ ಮೊಗವು ಎಂಥ ಚಂದವೊ
ನಗುವಿನಿಂದ ಗಳಿಸಬಹುದು ಜಗದ ಪ್ರೀತಿಯ
ವೈರತ್ವವನ್ನ ಅಳಿಸಲು, ಮಿತ್ರತ್ವವನ್ನ ಬೆಳೆಸಲು
ಇರಲೆಬೇಕು ಮುಗುಳುನಗೆಯು ನಮ್ಮ ಮೊಗದಲಿ ||

ನಗುವು ತಾನೆ ಮನುಜಗೊಂದು ದೊರೆತ ವರವದು
ಬಲಸು ಅದನು ಅಸ್ತ್ರವಾಗಿ ವೈರಿಯನ್ನ ಮನಿಸಲು
ವಿಶ್ವಶಾಂತಿ ಪಸರಿಸಿ, ನೆಮ್ಮದಿಯಲಿ ಬದುಕಿಸಿ
ಸ್ವರ್ಗವನ್ನ ಭುವಿಗೆ ತರುವ ಶಕ್ತಿಯೊಂದೆ ನಗುವದು ||

|| ಮುಸ್ಸಂಜೆ ತಂಗಾಳಿಲಿ ||

ನೋಡುವಾಸೆ ಚಂದ್ರನನ್ನು ನಿನ್ನ ಕಣ್ಣಲಿ

ಒಲವ ಧಾರೆ ಸುರಿಸು ಬಾರೆ ನನ್ನ ಮನದಲಿ

ಕಾಣದಂತೆ ಎಲ್ಲಿ ಹೋದೆ ಮಾಯಗುಹೆಯಲಿ

ಬಳಿಗೆಬಂದು ನನ್ನ ಊಳಿಸು ನಿನ್ನ ಜೊತೆಯಲಿ

ನಿನ್ನ ಕುರುಹು ಸಿಗಬಹುದೇ ಮುಸ್ಸಂಜೆ ತಂಗಾಳಿಲಿ

ಕತ್ತಲೆಯ ಸೀಮೆಯಲಿ ಕೊಲ್ಮಿಂಚ ಬೆಳಕಿನಲಿ

ನಿನ್ನ ಮೊಗವ ನಾ ನೋಡಲು

ಶಿಲೆಯಲ್ಲಿ ಬರೆದಿರುವ ಓಲೆಯನು ಕಳಿಸುವೆನು

ನೀ ಹೀಗೆ ಬರಬಾರದೇ...?

ನಿನ್ನ ಕನಸಿನ ಕನಸಲ್ಲೂ ಕನಸಾಗಿ ನಾ ಬರುವೆ

ನನ್ನ ಮನಸಿನ ಮನಸಲ್ಲೂ ಮನಸಾಗಿ ನೀನಿರುವೆ

ನಿನ್ನ ಕಂಪಿನ ಪರಿಸರವು ನನ್ನ ಸುತ್ತ ಇರುವಾಗ

ಉಸಿರಾಡುವ ಈ ಜೀವಕೆ ಹೊಸ ಹುರುಪು ಬಂದಾಗ

ನೀ ಹಾಗೆ ಸಿಗಬಾರದೇ....?                       

ಗುರಿ ಮುಟ್ಟುವ ತನಕ,

ವಿನಾಯಕ ಭಾಗ್ವತ

|| ಸ್ಪೂರ್ಥಿ ಗೀತೆ ||

ಕಾಣದ ಮನಸದು ಕೈಗಳ ಚಾಚಿ ಕರೆಯುತಿದೆ

ಆದರು ಎದೆಯಲಿ ಮರೆಯದ ನೋವೆ ಕೆದರುತಿದೆ ||

ಸುಪ್ತ ಮನಸಲಿ ಅರಿಯದ ಭಾವನೆ ಮೂಡುತಿದೆ

ಅದು ಗುಪ್ತಗಾಮಿನಿಯ ವೇಷದಲಿ ಮೆರೆಯುತಿದೆ ||

ಹಣೆಯ ಬರಹಗಳ ಓದಲು ಆಗದು ಎಂದೆಂದು

ಹಾಗೆ ಪ್ರೀತಿಯ ಬರಹವ ಅಳಿಸಲಾಗದು ಮುಂದೆಂದು ||

ಪಡುವಣ ಸೂರ್ಯನ ಕಿರಣಗಳಲ್ಲಿ ಹೊಸಬೆಳಕು

ಕಾಣುವ ಕನಸಿದು ಊರುಳುತಿದೆ ಪ್ರತಿ ಇರುಳು ||

ನೀನು ತಿಳಿಯಲೆ ಬೇಕು ಆಗುವುದೆಲ್ಲ ಒಳ್ಳೆಯದಕ್ಕೆ

ಮುಂದೆ ನಡೆಯುವುದೆಲ್ಲವು ಸೂತ್ರದಾರನ ಆಶಯದಂತೆ ||