|| ಮುಂಗಾರು ಮಳೆ ||

ನಡೆದಿದೆ ಅನ್ವೇಷಣೆಯ ಹೋರಾಟ
ಬದುಕಿನ ಬೆಳಕಿಗಾಗಿ ಹುಡುಕಾಟ
ಹೊನಲುಬೆಳಕಿನ ಕಾಂತಿಯಲು ಅರಸಿದೆ
ಮುಂಜಾವಿನ ತಿಳಿ ಬೆಳಕಿನಲು ಕಾಣದೆ ||

ವೃದ್ಧಿಸುತ್ತಿವೆ ಪ್ರತಿ ಕ್ಷಣದ ನಿರೀಕ್ಷೆಗಳು
ಬದುಕಲಿ ಬಯಕೆಯ ಭರವಸೆಗಳು
ಚಂಡಾಟದಂತೆ ತಪ್ಪದಿರಲೆಂಬ ತುಡಿತವು
ಆಸೆ ಕೈಗೂಡಲೆಂಬ ಮನಸಿನ ಮಿಡಿತವು ||

ನೀರಿರದ ಮರುಭೂಮಿಯಲಿ ಮಳೆಯಾದಂತೆ
ಬಯಲು ಭೂಮಿಯಲಿ ಕಾಮನಬಿಲ್ಲು ಮೂಡಿದಂತೆ
ಬರಡು ಭೂಮಿಯಲಿ ಹಸಿರು ಚಿಗುರೊಡೆದಂತೆ
ಕಲ್ಪಿಸಿದ ನೀ ಬರಲು ಮುಂಗಾರು ಮಳೆಯಾದಂತೆ ||

Fact...

The Thinking and Expectations will not be perfect as the practical which happen in life... It is the fact.

|| ಮುಚ್ಚಿಡ್ಲಾ ||

...ಡ್ರಾಮಾ ಚಿತ್ರದ "ಚಂದುಟಿಯ ಪಕ್ಕದಲಿ" ಹಾಡಿಗೆ ನನ್ನ ಸಾಲುಗಳು...

ಮುಚ್ಚಿಡ್ಲಾ

ತುಸು ಕಂಡು ನಿನ ಮೊಗವ
ನಸು ನಗುತ ಬಂದಿಹನು
ಬೆಳದಿಂಗಳಾರತಿಯ ಬೆಳಗಿಹನು...

ಈ ತಂಪು ನಡುಗೆಂಪು
ಮಲ್ಲಿಗೆಯ ಹೂ ಕಂಪು
ಕೇಳುತಲಿ ಈ ಹಾಡು ಬಲು ಇಂಪು...

ಬಚ್ಚಿಟ್ಟ ಮಾತೊಂದು ಮನಸಲ್ಲಿ
ಬಿಚ್ಚಿಡುವೆ ಅದ ನಿನ್ನ ಎದುರಲ್ಲಿ
ಉಗುಳದಿರು ಹುಚ್ಚುತನ ನನದೆಂದು ||

ಬರೆದಿರುವ ಕವನದಲಿ
ಭಾವ ನಾನಾಗಿರುವೆ
ಅನುಭವಿಸಿ ಹಾಡೆನ್ನ ಮುದನೀಡುವೆ...

ಜೀವನದ ಪಯಣದಲಿ
ದೂರ ನೀ ಹೋಗದಿರು
ಜೊತೆ ನಡೆವ ಸೌಭಾಗ್ಯ ನನದಾಗಲಿ...

ನಯನದಲಿ ನೀರಾಗಿ ಅಡಗಿರ್ಲಾ
ಮಾತಿನಲಿ ಪದವಾಗಿ ಹೊರಬರ್ಲಾ
ನೀ ನನ್ನ ಬದುಕೆಂದು ಹೇಳ್ಬಿಡ್ಲಾ ||

ಆಗಾಗ ಹೇಳುವೆನು
ಕಂಬನಿಯ ಒರೆಸುವೆನು
ನಿನಗಾಗಿ ನಾನಿರುವೆ ಕಾವಲಿಗೆ ಎಂದು...

ಚಳಿಯಲ್ಲು ಬೆವೆತಿಹೆನು
ಮಳೆಯಲ್ಲು ನೆನೆದಿಹೆನು
ಗುಮ್ಮನಾಟದಲಿ ನಾ ಸೋತಿರುವೆನೆಂದು...

ಹಸಿರಿನಲಿ ಹಸೆಮಣೆಯ ಹಾಕಿರ್ಲಾ
ಗರಟೆಯಲಿ ಹಣತೇನ ಹಚ್ಚಿಡ್ಲಾ
ಮುತ್ತಿನಲೆ ಮಾಂಗಲ್ಯ ಕಟ್ಬಿಡ್ಲಾ ||

ಕಟ್ಟಿಟ್ಟ ಕೊಳಲಿನ
ರೂಪದಂತಾಗಿಹೆನು
ಬಿಚ್ಚಿ ನುಡಿಸೆನ್ನನು ಧ್ವನಿಯಾಗಿ ಬರಲಿ...

ಈ ನಿನ್ನ ಜೀವದ
ಉಸಿರು ನಾನಾಗಿರುವೆ
ಮುಖದಲ್ಲಿ ಮೂಗಂತೆ ಎದುರಲ್ಲಿ ಇರ್ಲಾ...

ವಿಶ್ರಾಂತಿ ಇಲ್ದಂಗೆ ಜೊತೆಗಿರ್ಲಾ
ತುದಿಯಲ್ಲಿ ಜೇನಂತ  ಮಾತಾಡ್ಲಾ
ಇದ ಮುಕ್ತಾಯ ಮಾಡದೆ ಮುಚ್ಚಿಡ್ಲಾ ||

|| ನೀರಡಿಕೆ ||

ನಾನಿರುವ ಊರಿನಲಿ ಚಂದ್ರನಿಲ್ಲ

ನೀನಿರುವ ಉರಿನಲಿ ರವಿ ಕಾಣುತಿಲ್ಲ

ಬೆರೆತಾಗಿದೆ ನಾವು ಕವಿ ಕಲ್ಪನೆಯಲಿ

ಒಲವು ಚಿಮ್ಮಿತು ಮುಸ್ಸಂಜೆ ತಂಪಿನಲಿ ||

ಆ ತಾರೆ ಮಿನುಗುವುದ ಮರೆತಿಹುದು

ನಿನ ಮೊಗದ ಕಾಂತಿಯಲಿ ಮಂಕಾಗಿಹುದು

ನಾನೋಡದಾಚಂದ್ರ ನಿನ ಹಿಂದೆ ಅಲೆದಿಹನು

ಉರಿ ಕುಂದುವುದೆಂಬ ಭಯದಲಿ ಅಡಗಿ ಬೆಳಗುತಿಹನಾಸೂರ್ಯನು ||

ವಾರಿ ಸುಳಿಯಲಿ ಸಿಲುಕಿದರೂನು

ತೇಲಿ ಬರುವೆನು ನಿನ್ನಯ ಸೆಳೆತಕೆ

ಹೊಳೆಯ ಹನಿಯ ತಂಪಿನಲಿ ಭಾವನೆಗಳು

ಮೂಡಿಸಿವೆ ನಿನ ಅಂದದ ಬಿಂಬಗಳನು ||

ಕರಿಮೋಡ ಮಳೆಯಾಗಿ ಧರೆಗುರುಳಿ

ಬರಡು ಭೂಮಿಯ ಬಾಯಾರಿಕೆ ತಣಿಸಿದಂತೆ

ನನ ಎದೆಯು ಸುಡುತಿದೆ ವಿರಹದ ಬೇಗೆಯಲಿ

ನೀ ಬಂದು ಆರಿಸು ಈ ನೀರಡಿಕೆಯ ||

|| ಕತ್ತಲು ಕಳೆದಂತೆ ||

ನಂಬಿಕೆ ಬೇಕು ಸಂಬಂಧದಲಿ

ಬರವಸೆ ಇರಬೇಕು ಬದುಕಲಿ

ಬಂತೆಂದು ಕಷ್ಟ ಕೈಕಟ್ಟಿ ಕುಳಿತರೆ

ನೆರವೇರದು ಇಷ್ಟ ಬಾಳಿನಲಿ ||

ಏನಾದರು ಛಲಬಿಡದೆ ಮುನ್ನುಗ್ಗಲು

ಕಾಲ್ಮುರಿದು ಬೀಳುವುದು ಯಶಸ್ಸುಗಳು

ಮುಟ್ಟಿದಾಗ ಮುದುಡುವುದು ನಾಚಿಕೆಮುಳ್ಳು

ಕಲುಕದಿದ್ದಾಗ ನಗುತ ಅರಳುವುದು ಎಲೆಗಳು ||

ಚಾಣದೇಟು ಬಿದ್ದಾಗ ಕಲ್ಲಿನ ಕೆತ್ತನೆ

ಕಂಪಿಸದೆ ನೋಡುವ ಮೂರ್ತಿಗಳ ಬಿತ್ತನೆ

ಅಮವಾಸ್ಯೆಯಂದು ಮಾಯವಾದ ಚಂದಿರನು

ಹುಣ್ಣಿಮೆಯಂದು ಪೂರ್ಣವಾಗಿ  ಕಂಗೊಳಿಸುವನು ||

ಚಳಿಗಾಲದಿ ಎಲೆ ಉದುರಿ ಬೋಳಾದ ಮರಗಳು

ವಸಂತನಾಗಮನಕೆ ಮೈದುಂಬಿ ಸ್ವಾವಗತಿಸುವುದು

ಅರಸು ಆಳಾಗುವುದು, ಆಳು ಅರಸನಾಗುವುದು

ಕಾಲಚಕ್ರ ತಿರುಗಿದಾಗಾಗುವ ಸಹಜ ಕ್ರಿಯೆಗಳು ||

ಬದುಕಲಿ ಬೇಸರ ಕಷ್ಟದ ದಿನಗಳು

ಕಲಿಸುವುದು ಪಾಠವ ಎದುರಿಸಿ ಗಟ್ಟಿಯಾಗಲು
ಮರಳಿಯತ್ನಿಸಿ ಸಾಧಿಸು ನೀ ಹಠಬಿಡದೆ ಕಾರ್ಯವ

ಅಂಜಿ ಹೆದರದಿರು ಬೆಳಕು ಹರಿವುದು ಕತ್ತಲು ಕಳೆದಂತೆ ||

|| ಮೈ ಮರೆತಿದೆ ||

ನಿನ ಕನಸಿನ ರಾಗದಲ್ಲಿ

ನನ ಮನಸಿನ ಭಾವ ಬೆರೆಸಿ

ತಲೆಯ ತೂಗೊ ಶೃತಿಯ ನುಡಿಸಿ

ಸಪ್ತಸ್ವರದಿ ಹೃದಯಗೀತೆ ಗಾನವು ||

ನೀ ಹಾಡಿದೆ ಸಂಗೀತದ ಆಲಾಪನೆ ಇಂಪಾಗಿದೆ

ಅದ ಕೇಳಲು ತಂಪಾಗಲು ನನ ಕಲ್ಪನೆ ಸೊಗಸಾಗಿದೆ

ಒಲವಿನ ಗೀತೆಯು ಬರೆಯಲು ಕವಿತೆಯು

ಓದುವ ಮನಸು ಮೈ ಮರೆತಿದೆ ||

|| ಗುರಿ ಅರಸಿದೆ ||

ನಡೆದ ಹಾದಿಯು ಎಂಥ ಸುಂದರ

ಅರಿವ ಮುಂಚೆಯೆ ಕಳೆದವು

ನಲಿವ ಸಮಯದಿ ನಡೆದ ಹಾದಿಯು

ಮರೆತರೇನು ಚಂದವು ||

ಮನದ ಭಾವವ ಬರೆದು ಅಳಿಸಲಾಗದು

ಎದೆಯ ನೋವ ಪುಟದಲಿ

ಹಳೆಯ ಕ್ಷಣಗಳು ಮಾಸದೆಂದಿಗು

ಮನದ ಅಂಗಳದ ಶಿಲೆಯಲಿ ||

ಈಡೇರದ ಮನದ ಇಂಗಿತವನು

ನೆನೆದಂತೆ ಸಾಕಾರಗೊಳಿಸಲು

ಕವಲು ದಾರಿಯ ಪಯಣಕೆ

ಕವೆಯೇ ಆಧಾರವಾಯ್ತು ||

ಹೊಸ ಹೊಸ ಅನುಭವಗಳು

ಬದುಕಿನ ಪಾಠ ಕಲಿಸಿದೆ

ಈ ತ್ರಾಣ ವಿಶ್ರಾಂತಿ ಪಡೆಯಲು

ನಲಿವಿನ ಗುರಿ ಅರಸಿದೆ ||