|| ಕತ್ತಲು ಕಳೆದಂತೆ ||

ನಂಬಿಕೆ ಬೇಕು ಸಂಬಂಧದಲಿ

ಬರವಸೆ ಇರಬೇಕು ಬದುಕಲಿ

ಬಂತೆಂದು ಕಷ್ಟ ಕೈಕಟ್ಟಿ ಕುಳಿತರೆ

ನೆರವೇರದು ಇಷ್ಟ ಬಾಳಿನಲಿ ||

ಏನಾದರು ಛಲಬಿಡದೆ ಮುನ್ನುಗ್ಗಲು

ಕಾಲ್ಮುರಿದು ಬೀಳುವುದು ಯಶಸ್ಸುಗಳು

ಮುಟ್ಟಿದಾಗ ಮುದುಡುವುದು ನಾಚಿಕೆಮುಳ್ಳು

ಕಲುಕದಿದ್ದಾಗ ನಗುತ ಅರಳುವುದು ಎಲೆಗಳು ||

ಚಾಣದೇಟು ಬಿದ್ದಾಗ ಕಲ್ಲಿನ ಕೆತ್ತನೆ

ಕಂಪಿಸದೆ ನೋಡುವ ಮೂರ್ತಿಗಳ ಬಿತ್ತನೆ

ಅಮವಾಸ್ಯೆಯಂದು ಮಾಯವಾದ ಚಂದಿರನು

ಹುಣ್ಣಿಮೆಯಂದು ಪೂರ್ಣವಾಗಿ  ಕಂಗೊಳಿಸುವನು ||

ಚಳಿಗಾಲದಿ ಎಲೆ ಉದುರಿ ಬೋಳಾದ ಮರಗಳು

ವಸಂತನಾಗಮನಕೆ ಮೈದುಂಬಿ ಸ್ವಾವಗತಿಸುವುದು

ಅರಸು ಆಳಾಗುವುದು, ಆಳು ಅರಸನಾಗುವುದು

ಕಾಲಚಕ್ರ ತಿರುಗಿದಾಗಾಗುವ ಸಹಜ ಕ್ರಿಯೆಗಳು ||

ಬದುಕಲಿ ಬೇಸರ ಕಷ್ಟದ ದಿನಗಳು

ಕಲಿಸುವುದು ಪಾಠವ ಎದುರಿಸಿ ಗಟ್ಟಿಯಾಗಲು
ಮರಳಿಯತ್ನಿಸಿ ಸಾಧಿಸು ನೀ ಹಠಬಿಡದೆ ಕಾರ್ಯವ

ಅಂಜಿ ಹೆದರದಿರು ಬೆಳಕು ಹರಿವುದು ಕತ್ತಲು ಕಳೆದಂತೆ ||