|| ಕಾಣದ ಮೊಗವನು ಬಯಸುತ ಹೊರಟಾಗ ||

ಮೊಗ್ಗೊಂದು ಹೂವಾಗಿ ಅರಳುವ ಹಾಗೆ

ನೀನೊಮ್ಮೆ ನಗಬಾರದೆ...?

ಚೈತ್ರದ ಕೋಗಿಲೆಯ ದನಿಯಂತೆ

ನನ್ನ ಹೆಸರನೊಮ್ಮೆ ನೀ ಕೂಗಬಾರದೆ...?

ಉಸಿರಲ್ಲಿ ಬೆರೆತಿರುವ ಒಲವೆಲ್ಲ ಸೇರಿ

ಕಾಣದ ಮೊಗವೊಂದು ನನ್ನ ಕಣ್ಣಲಿ ಸೆರೆಯಾಗಿದೆ....||

ಯಾಕೋ ಕನಸೊಂದು ಕಾಣುವ ವಯಸಿಂದು ಶುರುವಾಯ್ತು

ನಿನ್ನ ಕಂಡ ಕ್ಷಣದಿಂದಲೆ...

ಕಾಣುವ ಕನಸನ್ನು ಕಳೆಯುವ ವಯಸನ್ನು

ತಾಳೆನೋಡಿ ತಿಳಿಯುವೆ ನೀ ಬರುವ ದಿನಗಳನು

ಈ ಹೊತ್ತಲಿ ನಿನ್ನ ಮಡಿಲಲಿ

ಮಂಜಂತೆ ನಾ ಕರಗಿ ನೀರಾಗಲೆ...||

ಮುಂಗಾರು ಎದುರಾಗಬಹುದು

ನಮ್ಮ ಜೋಡಿ ಚಿಗುರೊಡೆಯಲೆಂದು

ನಾ ನೋಡ ಸಿಗಬಹುದೆ ನಿನ್ನ ಮೊಗವ

ಸಿಂಗಾರ ಫಲವಾದ ದಿನದಂದು

ನಿನ್ನ ಹೊತ್ತು ಮೆರೆಯಲೆ ಖುಷಿಯಲ್ಲಿ ನಾನು

ನಮ್ಮ ಹರಸುವ ಶಿವಗಂಗೆಯಂತೆ

ಇನ್ನೆಲ್ಲೂ ಸಿಗದಂತ,ಇನ್ಯಾರು ಕೊಡದಂತ ಒಲವನ್ನ ನೀಡಲೆಂದು

ಕಾಯುತ್ತ ಹೋರಟಿಹುದು ಈ ಜೀವ ನಿನ್ನ ಸೇರಲೆಂದು...||

ಗುರಿ ಮುಟ್ಟುವ ತನಕ,

ವಿನಾಯಕ ಭಾಗ್ವತ