|| ತೊರೆದು ಹೊರಟಿರುವೆ ||

ಇಂಪಾದ ರಾಗದಲ್ಲಿ

ನನ ಮದುವೆಯ ಕರೆಯೋಲೆ

ನೀ ನೀಡು ಓ ಕೋಗಿಲೆ

ಗರಿ ಬಿಚ್ಚಿ ನಾಟ್ಯವಾಡಿ

ಆಕರ್ಷಿಸಿ ಸ್ವಾಗತವ

ನೀ ಕೋರು ಓ ನವಿಲೆ

ನಿಮ್ಮೊಂದಿಗೆ ನಾ ಕಳೆದ

ನೆನಪನ್ನು ಮೆಲಕುತ

ಇನಿಯನೂರಿಗೆ ನನ್ನ

ಕಳುಹಿಸಿಕೊಡ ಬನ್ನಿರೆ

ನಾ ಜೊತೆಯಾಗಿ

ಹೊರದುವ ಮುನ್ನ

ಬಳಿಬಂದು ಹರಸುತ

ಹೋಗಿ ಬಾ ಎಂದು

ಬಿಳ್ಕೊಡುವಿರಲ್ಲವೆ ||

ಈ ಹರಿವ ನೀರಿನಲಿ

ಮಿಂದು ಪುಳಕಿತನಾಗಲು

ತಾಯಿ ಶರಾವತಿಯ

ಕೃಪೆಯು ಇಹುದಲ್ಲವೆ

ವಿಶಾಲವಾದ ಗದ್ದೆಯಲಿ

ಬೆಳೆದಿರುವ ತೆನೆಯನ್ನು

ಕಿತ್ತು ತಿಂದು

ಬಲವಾಗಿ ಬೆಳೆದಿರುವುದು

ನಿಜವಲ್ಲವೆ ||

ಆ ಗುಡ್ಡ ಬೆಟ್ಟದಲಿ

ತುಂಬಿರುವ ಹಸಿರಿನಲಿ

ಅಡಗಿರುವ ನನ್ನ ಉಸಿರನ್ನು

ಧಾರೆಯೆರೆಯಿರಿ

ಹುಟ್ಟಿಂದ ಜೊತೆಯಿರುವ

ನಿಮ್ಮನ್ನು ನಾ

ತೊರೆದು ಹೊರಟಿರುವೆ

ಹರಸಿರಿ ನಮ್ಮನು

ಬಯಸಿರಿ ನಮ್ಮ

ಏಳಿಗೆಯನು ||