ಮನದ ರಾಗ ಭಾವಗೀತೆ

ಮನದ ರಾಗ ಭಾವಗೀತೆ

ಪದವ ಬರೆಯದೇ ಹಾಡಲು

ಬದುಕ ಬವಣೆ ಶೋಕಗೀತೆ

ಕದವ ತೆರೆಯದೇ ನೋಡಲು

ದಿಕ್ಕು ಕಾಣದು ದಾರಿ ತೋರಲು

ದೀನನಾದರೂ ದಯೆಯಲಿ

ಸೋಲು ಸಾಯದು ಬಾರಿ ಯಾದರು

ಸಹಿಸಿಯಾದರೂ ಬಾಳಲಿ

ಹೊಳಪು ಮಿನುಗುವ ಬೆಳಕ ತೋರುವ

ಹರಸಿ ನಿಂತಿಹ ದೈವವು

ಕೊಳಕು ಮನಸಲಿ ಪುಳಕ ಬೀರುವ

ಬೆಳೆಸಿ ಬೆಂದಿಹ ದೇವನು

ಹಳೆಯದನ್ನು ಮೆಲುಕುಹಾಕಲು

 ಹಳೆಯದನ್ನು ಮೆಲುಕುಹಾಕಲು ಹುರುಪು ಮತ್ತೆ ಮರಳದು

ಹೊಸತು ಈ ದಿನ ಹಬ್ಬ ಹರಿ ದಿನ ಖುಷಿಗೆ ಕಾರಣವಾಗದು

ಕಳೆದ ಬಾಲ್ಯದ ತೆರೆದ ದೃಶ್ಯವು ಕಣ್ಣ ಎದುರಲಿ ಓಡಿದೆ

ಆಧುನಿಕತೆಯು ಮಬ್ಬ ಹರಿಸಲು  ಸಡಗರವೆ ಅಡಗಿ ಹೋಗಿದೆ

ದವಡೆಗೆ ಮೂಲ

ಬಲಕೆ ಸಂಕೇತ

ಹುಲ್ಲನ್ನು ತಿನ್ನುವ ಆನೆಯು

ಸಾವಿಗೆ ಉಪಮೇಯ

ರಕ್ತವನ್ನ ಹೀರುವ ಸೊಳ್ಳೆಯು

ಬಡವ ಎನ್ನಲು ನೀ

ಮೂದಲಿಸದೆ ಗೌರವಿಸು

ಬಲ್ಲವ ನುಡಿಯಲು ನೀ

ಪರಾಮರ್ಷಿಸುತ ಸ್ವೀಕರಿಸು

ಇಂದು ಬರಬಹುದು

ನಾಳೆ ಮರೆಯಲುಬಹುದು

ಪ್ರೀತಿ ಇರಬಹುದು

ಒಲವು ಅಡಗಲುಬಹುದು

ಅರಿಬೇಕು ನೀನು ಬಾಳ ತಿರುಳ

ಮರಿಬೇಕು ನಾವು ವೈರ ದುರುಳ

ಬಲಕೆ ತಳುಕಿಲ್ಲ ಸಾವಿನ ಗುರುತು

ಬಡವನ ಕೋಪ ದವಡೆಗೆ ಮೂಲ

ಬದುಕಿನ ಬಂಡಿ

ಬದುಕಿನ ಬಂಡಿಯಲ್ಲಿ ನೂರಾರು ತಿರುವುಗಳು

ಆಗುವರಾರು ಇಲ್ಲಿ ಆ ದಾರಿಗೆ ದೀಪಗಳು

ವಿಧವಿಧವಾದ ರೂಪಗಳಲ್ಲಿ   ಆ ದೇವರ ಕುರುಹುಗಳು

ನಾಳಿನ ದಃಖದ ಯೋಚನೆಯಲ್ಲಿ ಈಗಿನ ಸುಖವಿರದು

ಮುಂದಿನ ಸುಖದ ಬಯಕೆಗಳಲ್ಲಿ

ಇಂದಿನ ಕೊರಗಾರದು

ಕ್ಷಣದಲಿ ಉಲಿಯುವ ನಗುವಿದು ಮಾತ್ರ ಎಂದೂ ಮರೆಯಾಗದು

ಮಾಡುವ ಕೆಲಸಗಳಲ್ಲಿ ನಿನ್ನಯ ಶ್ರಮವಿರಲಿ

ಫಲಿತಾಂಶದ ಗಳಿಕೆಯಲ್ಲಿ ಭಗವಂತನ ಕೃಪೆಯಿರಲಿ

ಕ್ರಮದಲಿ ದುಡಿಯುವ ಕೈಗಳಿಗೆಂದೂ ಸ್ವಂತಿಕೆ ಶೃತಿಯಿರಲಿ

ಎಲ್ಲರ ಹೃದಯಗಳಲ್ಲಿ ನೋವಿನ ಕಥೆ ಸಹಜ

ಬದುಕಿನ ಮಜಲುಗಳಲ್ಲಿ ದುಃಖದ ವ್ಯಥೆ ವಿವಿಧ

ಮರೆಮಾಚುವ ಕಣ್ಣಿನ ನಗುವುಗಳಲ್ಲಿ ಬೀಗುವ ಕಲಿ ಮನುಜ

ಹೂವು ಬಾಡದಿರದು

ಮಳೆಯಲ್ಲಿ ನೆಂದರೂ ಬಿಸಿಲಲ್ಲಿ ಬೆಂದರೂ

ಹೂವೆಂದೂ ಬಾಡದೇ ಇರಲಾರದು

ಇವ ಮೇಲೇ ಎದ್ದರೂ ಅವ ಕೆಳಗೇ ಬಿದ್ದರೂ

ಸಾವನ್ನು ಗೆದ್ದು ಬರಲಾಗದು

ಶೃತಿಯರಿತು ಇಡಬೇಕು ಸರಿಯಾದ ಹೆಜ್ಜೆ

ಇದ್ದಲ್ಲೇ ಹೊರಬೇಕು ಅವ ಕೊಡುವ ವಜ್ಜೆ

ಅಂತ್ಯಾದಿ ನಡುವೆ ಹೋರಾಟದುಳುಮೆ

ಹೊಂದಾಣಿಕೆಯೊಂದೆ ಈ ಬಾಳ ಗರಿಮೆ

ಗಳಿಸಿರುವ ಹಣವನ್ನು ನೀ ಹಂಚಿ ಸಾಗು

ಜನರೊಡನೆ ಛಲಬಿಟ್ಟು ನೀ ಕೊಂಚ ಬಾಗು

ಕೈ ಚಾಚಿ ನೆರವಾಗು ಬೇಡಿರುವ ಜನಕೆ

ನೋವಲ್ಲಿ ಜೊತೆಯಾಗು ಅಳುತಿರುವ ಮನಕೆ

ಮುಗುಳಿನ ಗಂಧ

ಬಯಲು ವೇದಿಕೆ ಮೇಲೆ

ಬೆಳೆದು ನಿಂತಾ ಮುಗುಳೆ

ಹೇಳು ಭೀಗುವ ಮುನ್ನ

ಯಾವ ಪಯಣವು ಭಿನ್ನ

ಎಲ್ಲೂ ಬೇಡದ ಮುನಿಸು

ಎಲ್ಲಾ ಬಯಸುವ ಕನಸು

ಹೊಂದಿದ ಬಗೆಯನ್ನು ತಿಳಿಸು

ಆಗುವ ಕಲೆಯನ್ನು ಕಲಿಸು

ನರಳಿ ತೂರುತಲಿರಲು 

ಬದುಕ ಬಂಡಿಯ ಒಳಗೆ

ಮಿಂಚು ಹುಳುವಿನ ರೀತಿ

ಮಿನುಗಿದಾ ದೀಪ

ತತ್ವವನು ತೊರೆದಂತೆ 

ಸಾಗಿದೆಯಾ ಬಾಳಿನಲಿ

ಸತ್ವವನು ಎದುರಿಟ್ಟು

ತೋರುವುದೇ ಕ್ರಾಂತಿ

ಜನರೆಲ್ಲ ಬೇಡುತಿಹ

ಹಾರೋ ದುಂಬಿ ಹರಡುತಿಹ

ಜೇನಿನ ಸಿಹಿಯಲ್ಲೂ

ಮುಗುಳಿನ ಗಂಧ

ಪ್ರೀತಿ ಹರಿವ ಹೊತ್ತು

ಸ್ಪೂರ್ತಿಯಾಗಲು ಅಸ್ತು

ಇರುವ ತಡೆಯನು ತೊಡೆದು

ನುಡಿಯುವುದೇ ಶಾಂತಿ

ಮೌನದಲೆ ಹಂಗಿಸುವ

ಮಾತಿನಲೆ ತಿವಿಯುತಿಹ

ಹಂಗಿನರಮನೆಗಿಂತ 

ಇಂಗಡದ ಗುಡಿ ಲೇಸು

ಹೊತ್ತುಗೊತ್ತು ಇಲ್ಲದಲೆ

ಸುತ್ತ ಸುತ್ತಿ ಹುಡುಕುತಿಹ

ಭ್ರಷ್ಟ ಸಂಸಾರಿಗಳು

ಪರಿಸರದ ಕಾಂತಿ...

ಬಯಲಿನ ಗೋಪುರ

ನನ್ನೆದೆಯ ಬಯಲಿನ ಗೋಪುರ

ನಿನ್ನ ನೆನಪಿನ ಪ್ರೀತಿಯ ಸ್ಮಾರಕ

ಒಣ ಹುಲ್ಲಿನ ಹಾಸಿಗೆ ರೂಪಕ

ಭಿನ್ನ ಮನಸಿನ ಭಾವನೆ ಪೂರಕ

ಬಿಸಿಯುಸಿರಿದು ಸೋಕಲು ಮೆಲ್ಲಗೆ

ನನ್ನ ಹಂಬಲವಾಗಲು ಮೆಲ್ಲಗೆ

ನಿನ್ನೆದೆಯ ನೆನಪಿನ ದೀವಿಗೆ

ಬೆಳಗುವುದೇ ಒಲವಿನ ಪ್ರೀತಿಗೆ

ಅಳಿವಿರದ ದೀಪದ ಜೋಳಿಗೆ

ಹೊತ್ತುತರಲು ಕಣ್ಣಿನ ಕಾಡಿಗೆ

ತಿಳಿಸುವುದೇ ನೀತಿಯ ಬಾಳಿಗೆ

ಹಸಿರಾಗಲು ಶಾಶ್ವತ ಕೂಳಿಗೆ